Gwamnatin Jihar Sakkwato ta kashe Naira biliyan 6.79 wajen tallafin karatu da sauran taimakon ilimi tsakanin Mayun 2023 da Satumbar 2026, tare da taimaka wa ɗaliban da aka kwashe daga ƙasar Sudan sakamakon yaƙi su koma karatu.
Kwamishinan Ilimi Mai Zurfi na jihar, Farfesa Isa Muhammad Maishanu, ne ya bayyana hakan yayin taron manema labarai kan nasarorin ma’aikatar da hukumomin da ke ƙarƙashinta a zamanin gwamnatin Gwamna Ahmad Aliyu Sokoto.
Maishanu ya ce gwamnatin ta tarar da bashin kuɗin makaranta da rajista da ba a biya ba, wanda ya shafi ɗaliban da ke karatu a manyan makarantu a Najeriya da ƙasashen waje.
- Hukumar Kwastam ta yi alƙawarin sauƙaƙa cinikayya da ƙara tara kuɗaɗen shiga
- Najeriya da Rwanda sun ƙarfafa haɗin gwiwar soji don magance matsalolin tsaro a Afirka
Ya ce an kafa kwamitocin tantance basussukan, inda aka biya Naira miliyan 555 domin biyan bashin kuɗin rajistar karatu na 2021/2022 a Jami’ar Usmanu Danfodiyo da ke Sakkwato.
Ya ƙara da cewa an tantance tare da biyan basussukan da ake bin jami’o’i 10 a Sudan, Jami’ar Wisconsin da ke Ghana da Jami’ar Integral da ke Indiya.
Haka kuma, gwamnati ta magance matsalolin ɗaliban Sakkwato da aka mayar daga Ukraine zuwa Jami’ar Baze da ke Abuja domin ci gaba da karatunsu.
Kwamishinan ya ce an taimaka wa ɗalibai 72 da aka kwashe daga Sudan domin ci gaba da karatu, yayin da wasu 24 suka kammala karatu ta hanyar yarjejeniyar fahimtar juna tsakanin Jami’ar Sudan International da Jami’ar Usmanu Danfodiyo.
Ya kuma ce an mayar da ɗalibai tara da ke shekarar ƙarshe zuwa Jami’ar Musulunci da ke Uganda domin kammala karatunsu.
Kwamishinan ya bayyana cewa jimillar kuɗin tallafin karatun da aka kashe ya kai Naira 6,791,891,890, wanda ya haɗa da Naira miliyan 945 a shekarar 2023, biliyan 3.08 a 2024, biliyan 2.08 a 2025 da miliyan 605 a 2026, baya ga Naira miliyan 67.2 da aka bayar a matsayin taimako ga ɗaiɗaikun ɗalibai.
Kuɗaɗen sun shafi kuɗin makaranta da rajista, abinci, masauki da sauran buƙatun ilimi da aka amince da su.