Shugaban Najeriya, Bola Ahmed Tinubu, ya kare manufofin tattalin arziƙin gwamnatinsa, yana mai cewa sauye-sauyen da ya aiwatar sun kawo ƙarshen almundahanar tallafin man fetur da safarar mai, duk da wahalhalun da ’yan Najeriya ke fuskanta.
Tinubu ya bayyana haka ne yayin ƙaddamar da yaƙin neman zaɓen APC na 2027 a Kaduna, inda ya ce gwamnatinsa na aiki don kawar da yunwa da talauci, tare da gina tattalin arziƙin da zai samar da ayyukan yi da damarmaki ga jama’a.
- Shugaba Tinubu ya isa Kaduna wajen ƙaddamar da kamfen ɗin APC na 2027
- ’Yan sanda sun kama mutum biyar kan zargin lalata da ƙananan yara a Bauchi
Ya amince cewa hanyar sauye-sauyen ba ta kasance mai sauƙi ba, amma ya yi alƙawarin ci gaba da aiki har sai jama’a sun fara ganin amfaninsu a rayuwarsu, kasuwancinsu da kuɗaɗen da suke samu.
Shugaban ya kuma danganta ayyukan gine-ginen hanyoyi, asibitoci, makarantu da kasuwanni da gwamnonin APC ke gudanarwa da ƙarin kuɗaɗen shiga da aka samu sakamakon sauye-sauyen.
Tinubu ya nemi masu zaɓe su sake ba shi da mataimakinsa, Kashim Shettima, wa’adin mulki na biyu a zaɓen shugaban ƙasa da aka tsara yi ranar 16 ga Janairu, 2027.