Ƙungiyar ’Yan Jarida ta Afirka (FAJ) ta jaddada buƙatar amfani da fasahar AI cikin gaskiya, tare da inganta yanayin aikin ’yan jarida domin tabbatar da ingantaccen aikin jarida a nahiyar.
Ƙungiyar ta bayyana hakan ne yayin wani taron tattaunawa na kwanaki biyu da ta gudanar a birnin Addis Ababa na Habasha, a ranakun 24 da 25 ga Oktoba, tare da tallafin UNESCO, Ƙungiyar Kwadago ta Duniya (ILO) da Tarayyar Turai (EU), inda Hukumar Tarayyar Afirka (AUC) ma ta halarta.
Taron ya tattauna yadda AI za ta taimaka wajen tattara labarai, samar da rahotanni da yaɗa su, da kuma yadda za a iya amfani da ita wajen ƙirƙira da yaɗa bayanan ƙarya.
- NCDC ta ƙara yawan waɗanda ake sa ido a kansu kan cutar Ebola zuwa 53
- WHO ta ce cutar shan inna na iya sake yaɗuwa idan ba a kawar da ita gaba ɗaya ba
Mahalarta sun kuma bayyana damuwa kan yadda ake amfani da fasahar wajen maye gurbin ’yan jarida a wuraren aikinsu.
An kuma duba sakamakon binciken FAJ kan yanayin aikin ’yan jarida a Afirka, musamman yadda rashin tabbas kan ayyukan yi da barazanar tsaro ke shafar ikon ’yan jarida na gudanar da rahotannin da ke amfanar jama’a.
Ƙungiyar ta jaddada cewa duk da taimakon da fasaha za ta iya bayarwa, ba za ta maye gurbin ƙwarewar ɗan jarida wajen tantance bayanai, yanke hukunci da ɗaukar alhakin rahoto ba.
Taron ya ƙare da amincewa da wani shirin fafutuka na FAJ domin inganta yanayin aikin ’yan jarida, ingancin aikin jarida da kuma amfani da AI cikin alhaki a faɗin Afirka.