An buɗe babban taron muhawara na babban taron Majalisar Ɗinkin Duniya karo na 81, wato UNGA 81, a ranar Talata 22 ga Satumba 2026, a hedikwatar Majalisar Ɗinkin Duniya da ke birnin New York na Amurka.
Shugabannin ƙasashe da gwamnatoci da jami’an diflomasiyya daga sassa daban-daban na duniya ne suka hallara domin halartar taron.
Taken taron na bana shi ne “Maido da amana, da tafiyar da sauye-sauyen Majalisar Ɗinkin Duniya da ke samar da sakamako ga kowa.”
-
Duniya za ta yi mamakin sabbin makaman mu-Iran
-
Uganda ta dakatar da haɗin gwiwar soji da Turkiyya sakamakon rikicin siyasa
A yayin makon babban taron, shugabannin duniya za su tattauna kan wasu muhimman batutuwan da suka shafi al’amuran ƙasa da ƙasa.
Ƙaruwar tashe-tashen hankula tsakanin ƙasashe, musamman rikice-rikicen da ke ci gaba da faruwa a yankin Gabas ta Tsakiya, na daga cikin manyan batutuwan da ake sa ran shugabannin duniya za su mayar da hankali a kai.
Haka kuma, taron zai mayar da hankali kan yadda za a tafiyar da haɗurran da ka iya biyo bayan amfani da fasahar (AI), da kuma samar da ƙa’idojin ɗa’a da za su jagoranci amfani da ita da sauran sabbin fasahohin dijital.
Taron Majalisar Ɗinkin Duniya karo na 81, zai kuma mayar da hankali kan yaƙi da sauyin yanayi, da buƙatar ƙasashe su ƙara ɗaukar matakan rage illolinsa da kuma samar da kuɗaɗen da ake buƙata domin wannan aiki.
Haka kuma, za a tattauna kan sauye-sauyen da ake samu wajen komawa amfani da makamashi mai tsafta, shekaru 10 bayan cimma wasu muhimman yarjejeniyoyin ƙasa da ƙasa kan sauyin yanayi.
A wannan zama, ministan harkokin wajen Bangladesh, Dr Khalilur Rahman, ne ke jagorantar babban taron, lamarin da ya sa Bangladesh ta zama ƙasa ta biyu a tarihi da ta samu shugabancin babban taron Majalisar Ɗinkin Duniya sau biyu.
A shekarar 1986 zuwa 1987, Humayun Rashid Choudhury ne ya jagoranci taron karo na 41.
Ana kuma sa ran tattaunawa kan wanda zai maye gurbin Sakatare-Janar na Majalisar Ɗinkin Duniya, António Guterres, wanda wa’adinsa na biyu zai ƙare a ranar 31 ga Disamba 2026.
Firayministan Bangladesh, Tarique Rahman, zai gabatar da jawabi a babban taron a ranar 24 ga Satumba, inda ake sa ran zai bayyana abubuwan da ƙasar sa ta sa a gaba a sabuwar duniyar da ke gogayya da juna da fuskar makamashi.