Rundunar ’yan sandan jihar Bauchi ta ce ta kama mutum biyu da ake zargi da hannu a kashe mutane biyu a wasu sassan jihar, ciki har da wata jaririya mai watanni huɗu.
A Zirami da ke yankin Azare, an kama wani matashi mai shekaru 27 bayan an samu gawar ’yarsa, mai watanni huɗu.
Mahaifiyar jaririyar ta ce ta bar ta tana barci, amma bayan ta dawo ta same ta ba ta numfashi, sannan ta ga mijinta yana fitowa daga ɗakin.
Binciken likita ya tabbatar da cewa jaririyar ta mutu ne sakamakon shake ta.
- Gwamna Aliyu ya ce ba za su sassauta wa ’yan bindiga ba har sai ’yan gudun hijira sun koma gidajensu
- Shettima ya gabatar da matsayin Najeriya kan sake fasalin Majalisar Dinkin Duniya
A wani lamari kuma a ƙauyen Wasari da ke Gadau, an kama wani mai shekaru 25 bisa zargin kashe wata mata mai shekaru 60.
’Yan sanda sun ce wanda ake zargin ya shiga gidan matar ne, ya yanka mata wuya tare da daba mata wuka, yana zargin ta da tsafi da haddasa rashin lafiyar wata ’yar unguwarsu.
Rundunar ’yan sandan Bauchi ta ce duka shari’o’in suna karkashin bincike, kuma za a mika su zuwa sashen binciken manyan laifuka na jihar domin zurfafa bincike.
Kwamishinan ’yan sandan jihar, CP Sani-Omolori Aliyu, ya yi Allah-wadai da kisan da ya shafi zargin tsafi da kuma cin zarafin mata da yara, tare da gargadin jama’a da su guji ɗaukar doka a hannunsu.