Firaministan Isra’ila, Benjamin Netanyahu, ya caccaki wakilan ƙasashe da suka fice daga zauren Majalisar Ɗinkin Duniya yayin da ya fara jawabinsa a taron Majalisar Ɗinkin Duniya karo na 81 da ke New York.
Yayin da wakilan ƙasashe da dama ke barin zauren, Netanyahu ya mayar da martani cikin kalamai masu zafi, inda ya kira waɗanda suka fita da “matsoratan ɗabi’a”, tare da cewa sauran waɗanda ke shirin fita su ma su bi sahunsu.
Netanyahu ya ce Isra’ila ba za ta ja da baya wajen kare kanta ba, yana mai kare matakan sojin ƙasar kan Iran da Hamas.
- An kama mutum biyu kan kashe jaririya a Bauchi
- Shettima ya gabatar da matsayin Najeriya kan sake fasalin Majalisar Dinkin Duniya
Ya kuma yi ikirarin cewa hare-haren da Isra’ila ta kai kan cibiyoyin nukiliyar Iran sun kasance matakin da ya zama dole domin kare Isra’ila da sauran ƙasashe.
Dangane da yakin Gaza, Netanyahu ya yi watsi da zarge-zargen cewa Isra’ila na aikata kisan kare dangi, inda ya kira irin waɗannan zarge-zarge “babbar ƙaryar ƙarni”.
Ya kuma zargi Hamas da amfani da fararen hula a matsayin garkuwa, tare da kare matakan da Isra’ila ta ce tana ɗauka domin kare fararen hula.
Jawabin Netanyahu ya zo ne a daidai lokacin da Isra’ila ke fuskantar suka daga wasu shugabannin duniya kan yakin Gaza.
Ficewar wakilan daga zauren yayin da ya fara magana ya zama ɗaya daga cikin abubuwan da suka fi ɗaukar hankali a zaman Majalisar Ɗinkin Duniyar na bana.