Tsohon Gwamnan Anambra, Peter Obi, ya musanta ikirarin cewa ya bar jihar da bashin dala miliyan 123.77, yana mai cewa kudaden da ake magana a kai sun haɗa da shirye-shiryen tallafin raya ƙasa da gwamnatin tarayya ta samo daga Bankin Duniya da IFAD.
Obi ya ce a lokacin da yake gwamna bai nemi rance daga wata cibiyar kuɗi ba, kuma bai fitar da bond a madadin gwamnatin Anambra ba.
Ya ce bai dace a haɗa jimillar kudaden da aka amince da su da waɗanda aka raba ko aka janye a zahiri a kira su duka bashin da ya bari ba.
- An kama mutum biyu kan kashe jaririya a Bauchi
- Netanyahu ya kira wakilan da suka fita daga jawabinsa ‘matsorata’
Ya kuma ce bayanan Hukumar Kula da Basussukan Najeriya, DMO, sun nuna cewa bashin waje na Anambra ya kai kusan dala miliyan 18 a lokacin da ya karɓi mulki a 2006, sannan kusan dala miliyan 30 lokacin da ya bar mulki a Maris 2014.
Sai dai gwamnatin Anambra ta ce akwai rance na waje guda takwas da aka kulla a lokacin mulkin Obi, wanda jimillarsa ta kai dala miliyan 123.77, yayin da kusan dala miliyan 92.35 ke kan gaba a matsayin ragowar bashi zuwa Yuni 2026.
Gwamnatin ta ce tana ci gaba da biyan bashin.
Obi ya kuma ce ya bar sama da dala miliyan 150 a matsayin kudade da jarin da ya kamata su samar wa jihar kuɗin shiga, yana mai cewa takardun da ke tabbatar da hakan za a iya tantance su.
Ya ce ba ya son ci gaba da musayar kalamai da gwamnatin Anambra kan batun, yana mai cewa hankalinsa zai koma kan matsalolin da ke addabar al’ummar Najeriya da kuma burinsa na neman shugabancin ƙasa a 2027.