Rundunar ’Yan Sandan Jihar Kano ta kama wani makaniki mai shekaru 24 bisa zargin satar motar ƙirar Kia Optima ta shekarar 2014, wadda darajarta ta kai naira miliyan takwas, tare da mayar da motar ga mai ita.
Sanarwar da kakakin rundunar, CSP Abdullahi Haruna Kiyawa, ya fitar a ranar 21 ga Oktoba, 2026, ta ce an sace motar baƙa a gaban asibitin Ziha Health Care da ke Karkasara, a ƙaramar hukumar Tarauni, ranar 4 ga Oktoba.
Rundunar ta ce matar mai motar ce ta ajiye ta a wajen asibitin da misalin ƙarfe 6 na yamma, kafin a kai rahoton satar ga ’yan sanda da misalin ƙarfe 7:20 na yamma a wannan rana.
- Ƙungiyar mata masu goyon bayan Tinubu ta kai ziyara ga Ministan Yaɗa Labarai
- WHO ta bukaci a inganta kula da lafiyar matan da suka daina al’ada
Bayan fara bincike bisa bayanan sirri, jami’an sashen Special Intervention Squad sun kama wanda ake zargin a garejin Farm Centre da ke Tarauni, ranar 18 ga Oktoba, inda aka same shi da motar da aka sace.
Binciken farko ya nuna cewa wanda ake zargin makanikin motar ne, kuma an same shi da ita a garejinsa.
Rundunar ta ce ana ci gaba da bincike, bayan da aka tabbatar da mallakar motar tare da mayar da ita ga mai ita.
Kwamishinan ’Yan Sandan Kano, Ibrahim Adamu Bakori, ya yaba wa jami’an da suka gudanar da aikin, tare da shawarci masu motoci su riƙa miƙa motocinsu ga amintattun kanikawa.
Ya kuma buƙaci jama’a su ƙara tsaurara tsaron motocinsu tare da kai rahoton abubuwan da ake zargi ga ofishin ’yan sanda mafi kusa.