Majalisar Bincike da Bunƙasa Ilimi ta Najeriya (NERDC) ta yi gargaɗi kan yaɗa bayanan da ba a tabbatar da sahihancinsu ba a shafukan sada zumunta game da sabon tsarin karatun firamare, ƙaramar sakandare da babbar sakandare.
Majalisar ta bayyana cewa an tsara sabon tsarin karatun ne bisa bincike da ƙwarewar da ake buƙata, domin inganta sakamakon karatu, rage cunkoson darussa da koyar da ɗalibai dabarun aiki da za su taimaka musu a ƙarni na 21.
Ta ce tsarin ya ƙunshi fannoni kamar fasahar dijital, koyon ƙananan na’urorin mutum-mutumi, basirar AI, sana’o’i, ilimin zama ɗan ƙasa da tarihin Najeriya.
- Kamfanin Dangote ya ware miliyoyin nairori don tallafawa karatun ɗalibai a Benue
- Hukumar Kwastam ta yi alƙawarin sauƙaƙa cinikayya da ƙara tara kuɗaɗen shiga
Haka kuma, yana ƙarfafa ɗabi’u nagari, haƙuri da juna a addinai, haɗin kan ƙasa da zaman lafiya.
NERDC ta jaddada cewa darussan da aka amince da su su ne waɗanda ta sanar a hukumance. Ta ce an fara aiwatar da sabon tsarin ne a farkon kowane zangon karatu na shekaru uku, wato a aji ɗaya da na huɗu na firamare, JSS 1 da SSS 1.
Saboda haka, majalisar ta buƙaci iyaye, malamai, shugabannin makarantu da sauran masu ruwa da tsaki su yi watsi da jerin darussan da ba a tabbatar da su ba, da jadawalin koyarwa da sauran bayanan da ake yaɗawa a intanet ba tare da sahihiyar hujja ba.
Majalisar ta buƙaci jama’a su duba shafinta na hukuma, www\.nerdc.gov.ng, domin samun ingantattun bayanai game da sabon tsarin karatun da darussan da aka amince da su.