Jam’iyyar ADC ta zargi gwamnatin Shugaba Bola Ahmed Tinubu da gaza magance matsin tattalin arziki da tsadar rayuwa a Najeriya.
Daraktan yaɗa manufofin sadarwa na kwamitin yaƙin neman zaɓen shugaban ƙasa na jam’iyyar, Phrank Shaibu, ne ya bayyana hakan a cikin wata sanarwa da ya fitar ranar 24 ga Oktoba, 2026.
Shaibu ya kuma soki Dele Alake kan zargin cewa Atiku Abubakar da ADC na da hannu wajen yaɗa wasiƙar bogi da bidiyon da aka ƙirƙira da fasahar AI.
- Gwamnatin Jihar Katsina ta ƙaddamar da tashar wutar lantarki mai ƙarfin 120MVA a Kankia
- Sojin saman Najeriya 160 sun kammala kwasa-kwasai shida a Bayelsa
Ya ce Alake bai gabatar da hujjojin da ke tabbatar da zargin ba, inda ya buƙaci APC ta bayyana hujjojin da take da su.
Sanarwar ta ce farashin man fetur ya kai kusan naira 1,400 kan kowace lita, yayin da dizal ya haura naira 2,000. Shaibu ya ce tsadar kayayyaki da raguwar ƙarfin sayen jama’a na ƙara wa ’yan Najeriya wahala, yana mai cewa ba za a iya magance waɗannan matsaloli ta hanyar musanta su ba.
Ya kuma yi zargin cewa an kai magoya bayan APC daga wasu jihohi zuwa taron jam’iyyar a Kaduna, inda wasu suka kwana a kan tituna. Ya ambaci rahotannin haɗurran da suka shafi wasu magoya bayan da suka taso daga Sakkwato da Abuja, amma ya ce har yanzu ba a tabbatar da cikakkun bayanan lamarin ba.
Shaibu ya zargi APC da fifita nuna yawan jama’a a tarukan siyasa maimakon kula da lafiyarsu da tsaronsu.
Ya ce ’yan Najeriya za su iya hukunta jam’iyyar a zaɓe saboda tsadar rayuwa da abin da ya kira gazawar cika alkawura.