Za a gudanar da bikin bayar da kyautar Ballon d’Or ta shekarar 2026 a ranar Litinin, 26 ga Oktoba, a birnin Landan na ƙasar Ingila, a karon farko cikin tarihin kyautar da aka fara bayarwa a shekarar 1956.
Bikin, wanda zai gudana a gidan wasan kwaikwayo na London Palladium da ƙarfe 8:00 na dare agogon GMT, zai kasance bikin cika shekaru 70 da kafa kyautar da ake ɗauka a matsayin ɗaya daga cikin manyan lambobin yabo ga ’yan wasan ƙwallon ƙafa.
- Kano Pillars Para-Soccer za ta fara Gasar World Polio Day a Abuja
- NPFL: ‘Yan wasan Nasarawa United sun samu kyautar Naira miliyan 1
Tsohon ɗan wasan ƙwallon ƙafa na Faransa, Thierry Henry, da fitacciyar mai gabatar da shirye-shiryen wasanni, Kate Scott, ne za su jagoranci bikin.
An zaɓi Landan a matsayin wurin gudanar da shi domin girmama Stanley Matthews, ɗan wasan Ingila da ya lashe kyautar farko a shekarar 1956.
Kyaututtukan da za a bayar sun haɗa da Ballon d’Or na maza da mata, mafi hazakar matashin ɗan wasa, mafi kyawun mai tsaron gida, koci da kulob, da kuma kyautar gwarzon ɗan wasan da ya fi zura ƙwallaye.
Haka kuma, za a bayar da kyautar Sócrates ga zakarun da ke tallafa wa ayyukan jin ƙai da al’amuran da suka shafi al’umma.
A shekarar 2025, Ousmane Dembélé na Paris Saint-Germain ya lashe Ballon d’Or na maza, yayin da Aitana Bonmatí ta Barcelona ta lashe ta mata.
Sauran waɗanda suka lashe kyaututtuka sun haɗa da Lamine Yamal da Vicky López a rukunin matasa, da Gianluigi Donnarumma da Hannah Hampton a rukunin masu tsaron gida.
Hukumar France Football ce ke kula da tsarin zaɓen waɗanda za su lashe kyaututtukan, yayin da UEFA ke haɗin gwiwa wajen shirya bikin tun daga shekarar 2024.