Ƙungiyar ƙwallon ƙafa ta Kano Pillars Para-Soccer za ta fara fafatawa a gasar World Polio Day Para-Soccer Tournament ta shekarar 2026, karo na takwas, da ake gudanarwa a Abuja, inda za ta kara da takwararta ta Yobe a yau Laraba, 21 ga Oktoba.
Gasar ta fara ne a ranar Litinin, 19 ga Oktoba, kuma za a ƙare ranar Lahadi, 25 ga Oktoba, 2026.
Ƙungiyoyi takwas ne ke fafatawa, waɗanda suka haɗa da Kano, Yobe, Sokoto, Kebbi, Nasarawa, Abuja, Team Founder da Team President.
- Shettima ya kafa kwamitin bunkasa kiwo da noman kayan abinci a Najeriya
- APC ta fara shirye-shiryen yaƙin neman zaɓen Shugaba Tinubu
- Gwamnatin Tinubu na gina gidaje sama da 10,000 a jihohi 14
A cewar sanarwar da jami’in yaɗa labarai na Hukumar Wasanni ta Jihar Kano, Ashiru Rabiu Gidan Tudu, ya fitar, an raba ƙungiyoyin zuwa rukuni biyu.
Rukuni na A ya ƙunshi Kano, Yobe, Sokoto da Team President, yayin da Rukuni na B ya haɗa da Abuja, Kebbi, Nasarawa da Team Founder.
Kano Pillars Para-Soccer za ta fuskanci Yobe a wasanta na farko, da fatan samun sakamako mai kyau da zai taimaka mata wajen ci gaba da neman lashe gasar ta bana.
Mai horar da ƙungiyar, Ibrahim Musa, ya ce ’yan wasansa sun kammala shirye-shirye kuma a shirye suke su taka rawar gani.
Ya kuma yaba wa gwamnatin Jihar Kano da shugaban hukumar wasanni, Alhaji Muhammad Tukur Babangida, bisa goyon bayan da suke bai wa harkokin wasanni a jihar.
Daga Ibrahim Hamisu, Kano