Ɗan wasan ƙwallon ƙafa na Portugal, Cristiano Ronaldo, ya sanar da aniyarsa ta yin ritaya daga wakiltar ƙasarsa a wasannin ƙasa da ƙasa, bayan kammala hutun wasannin ƙasashen duniya na watan Nuwamba, 2026.
Ronaldo mai shekaru 41 ya bayyana hakan ne a ranar Alhamis, 5 ga Nuwamba, 2026, inda ya ce zai ajiye rigar ƙasa mai lamba 7 da ya shafe shekaru da dama yana sanyawa.
Tauraron wanda ke taka leda a ƙungiyar Al-Nassr ta Saudiyya, ya wakilci Portugal a wasanni 234, inda ya zura ƙwallaye 146, abin da ya sanya shi kan gaba a tarihin ƙasar wajen yawan wasannin da ya buga da kuma ƙwallayen da ya ci wa tawagar.
- Kotu ta soke shugabancin ADC ƙarƙashin David Mark tare da rushe takarar Atiku na 2027
- Kamala Harris ta ce sakamakon zaɓen tsakiyar wa’adi ya nuna rashin jin daɗin Amurkawa da gwamnatin Trump
Ronaldo ya fara wakiltar Portugal ne a shekarar 2003, kuma ya taimaka wa ƙasar ta lashe gasar Euro 2016 da kuma kofin UEFA Nations League sau biyu.
Sanarwar ta zo ne bayan da Ronaldo ya bayyana cewa gasar cin kofin duniya ta 2026 ita ce ta ƙarshe da zai buga, duk da cewa a watan Oktoba ya ce har yanzu yana da niyyar ci gaba da wakiltar ƙasarsa.
Ritayar tasa za ta kawo ƙarshen doguwar tafiya ta ɗaya daga cikin fitattun ’yan wasan ƙwallon ƙafa a tarihin Portugal, bayan ya kafa tarihi a matsayin wanda ya fi kowa yawan wasanni da ƙwallaye a tawagar ƙasar.