Ministan Babban Birnin Tarayya Abuja, Nyesom Wike, ya ce za a ɗaukaka wasu masarautu a Abuja a watanni masu zuwa, bayan gwamnatin Shugaba Bola Ahmed Tinubu ta ɗaukaka sarakunan gargajiya 16 zuwa matsayin aji na ɗaya da na biyu.
Wike ya bayyana cewa ya miƙa wa sarakunan takardun shaidar girma, wasiƙun naɗi, sandunan sarauta da sabbin motocin SUV a madadin shugaban ƙasa.
Ya ce sarakunan sun fito ne daga masarautu 16 da ke cikin Abuja.
- An shirya muhawarar ’yan takarar da ke neman shugabancin Najeriya ranar 10 ga Janairu
- Babachir Lawal ya ce Obi zai lashe zaɓen shugaban ƙasa na 2027
Ya tuna cewa tun bayan kafa Majalisar Sarakunan Gargajiya ta Abuja a shekarar 1997, masarautar Ona na Abaji ce kaɗai aka taɓa ɗaukaka matsayinta, lamarin da ya sa sauran sarakuna suka shafe shekaru suna jiran irin wannan dama duk da hidimar da suke yi wa al’ummominsu.
Ministan ya ce Shugaba Tinubu ne ya amince da ɗaukaka sarakunan a ƙarƙashin shirin Renewed Hope Agenda, yana mai jaddada cewa sarakunan gargajiya na da muhimmiyar rawa wajen tabbatar da zaman lafiya da samar da yanayin gudanar da ayyukan gwamnati.
Ya kuma ce za a tanadi kuɗin gina fadojin sarakunan aji na ɗaya a kasafin kuɗin 2027, kafin daga bisani a faɗaɗa shirin zuwa sarakunan aji na biyu.