Jam’iyyar NDC ta ce ta kammala shirye-shiryen kafawa da ƙaddamar da Majalisar Yaƙin Neman Zaɓen Shugaban Ƙasa, wadda za ta jagoranci shirye-shiryen yaƙin neman zaɓen 2027.
Jam’iyyar ta ce ɗan takararta, Peter Obi, da abokin takararsa, Rabiu Musa Kwankwaso, sun gudanar da tattaunawa da shugabannin jam’iyyar kan tsarin majalisar, kuma an ba su damar zaɓar wasu daga cikin manyan jami’an yaƙin neman zaɓen tare da tuntuɓar jam’iyyar.
NDC ta ce an riga an kammala tsarin majalisar tun watan Agusta, yayin da ake jiran shawarwari daga Obi da Kwankwaso kafin a sanar da sunayen jami’an tare da ƙaddamar da majalisar.
- Iran na da ikon kai hare-haren makamai masu linzami a duk inda ta ga dama – Ghalibaf
- Malami ya ce rikicin Mambilla ya fara tun kafin ya zama minista
Jam’iyyar ta ce an kuma shirya jadawalin yaƙin neman zaɓen, amma ana kan kammala shirye-shiryen tattara kuɗaɗen yaƙin neman zaɓen.
Game da gudanar da kuɗaɗen, jam’iyyar ta ce Daraktan Kuɗi da mataimakinsa, tare da Ma’ajin jam’iyyar na Ƙasa, za su kula da asusun yaƙin neman zaɓen cikin gaskiya da rikon amana, domin cika buƙatun da dokar zaɓe ta tanada.
NDC ta kuma umarci shugabannin jam’iyya na jihohi da ƙananan hukumomi su fara tattara sunayen jami’an da za su wakilci jam’iyyar a rumfunan zaɓe, tare da kammala aikin cikin makonni biyu kafin fara horas da jami’an.