Tsohon Ministan Shari’a, Abubakar Malami, ya ce rikicin da ya shafi kamfanin Sunrise Power da aikin wutar lantarkin Mambilla ya fara tun shekarar 2003, shekaru kafin ya zama Ministan Shari’a.
Ofishinsa ya ce Malami ya gaji tsohuwar takaddamar ne da ta riga ta shafi gwamnatoci da jami’ai daban-daban, kuma rawarsa ita ce bai wa gwamnatin tarayya shawarar shari’a kan yadda za ta magance rikicin.
- An buɗe taron Majalisar Ɗinkin Duniya karo na 81 a New York
- Shugabannin Gulf za su matsa wa Trump kan hanyar kawo ƙarshen rikicin Gabas ta Tsakiya
Sanarwar ta ce tsohon Shugaba Muhammadu Buhari bai amince da biyan dala miliyan 200 da aka tattauna a matsayin yarjejeniyar sulhu ba, sannan Malami ya umurci lauyoyin gwamnati su yi adawa da yunƙurin Sunrise na aiwatar da yarjejeniyar.
Malami ya kuma musanta zargin cewa ya shiga wata yarjejeniyar cin hanci, yana mai cewa zai fitar da cikakken martani bayan nazarin hukuncin kotun sulhu mai shafuka 616.