Ɗan takarar shugaban ƙasa na Jam’iyyar NDC a zaɓen 2027, Peter Obi, ya ce babbar matsalar Najeriya ba ƙarancin albarkatun ƙasa ba ce, illa gazawar mayar da waɗannan albarkatu zuwa ci gaban al’umma, da samar da tsaro da wadata.
Obi ya bayyana hakan ne a cikin saƙonsa ga ’yan Najeriya yayin bikin cika shekaru 66 da samun ’yancin kai, inda ya ce ranar ’yancin kai ya kamata ta zama lokacin da ƙasar ke duba inda ta fito, da inda take a yanzu da kuma inda take son zuwa.
Ya ce Najeriya na ci gaba da fuskantar manyan ƙalubale da suka haɗa da talauci, rashin tsaro, ta’addanci, satar mutane, yunwa, yawan yaran da ba sa zuwa makaranta, rashin aikin yi da matsalolin kiwon lafiya.
- NiMet ta yi gargadin yiwuwar ambaliyar ruwa a jihohi 21 na Nigeria
- Sarkin Musulmi ya tabbatar cewa za a riƙa gudanar da babban taron NSCIA duk shekara
Obi ya kuma bayyana ziyarar kwanaki biyu da ya kai Jihar Sokoto tare da Sanata Rabiu Kwankwaso, inda suka tattauna da al’ummomi kan matsalolin tsaro, talauci, rashin aikin yi, shaye-shayen miyagun ƙwayoyi da yaran da ba sa zuwa makaranta.
Ya ce ziyarar da suka kai sansanin ’yan gudun hijira na Ramin Kura ta nuna musu mawuyacin halin da dubban mata da yara ke ciki.
Ya ce mutanen da ke sansanin ya kamata su kasance cikin al’ummominsu suna zuwa makaranta, noma, kasuwanci da bayar da gudunmawa ga tattalin arziƙi, maimakon rayuwa a matsayin ’yan gudun hijira a cikin ƙasarsu.
Obi ya ce saƙonsa na ranar ’yancin kai ba na yanke ƙauna ba ne, yana mai cewa sabuwar Najeriya mai yiwuwa ce, tare da bayyana shirin mayar da hankali kan tsaro, ilimi, kiwon lafiya, samar da ayyukan yi, noma da masana’antu.
Ya kuma yi alkawarin cewa idan ya zama shugaban ƙasa, zai mayar da mulki mai aunawa da ɗaukar alhaki kan jin daɗin jama’a, tare da sauya tattalin arziƙin ƙasar daga dogaro da amfani zuwa samar da kayayyaki da ayyukan yi.