Hukumar Fansho ta Sojoji ta fara aiwatar da sabon tsarin biyan fansho tare da biyan kuɗaɗen bashin baya ga tsoffin sojojin da suka yi ritaya.
Hukumar ta bayyana cewa an fara shigar da kuɗaɗen sabon tsarin fanshon da kuma bashin da ya tara cikin asusun ’yan fanshon tun daga ranar 2 ga Oktoba.
Jami’in hulɗa da jama’a na hukumar, Squadron Leader Aliyu Mohammed, ya ce sauyin ya biyo bayan aiwatar da sabon mafi ƙarancin albashi ne, wanda ya haifar da buƙatar daidaita adadin fanshon da ake biyan tsoffin sojojin.
- INEC ta gargadi jama’a kan shafin bogi na rajistar masu zaɓe
- Zan yiwa Tinubu kamfe matukar litar fetur ta dawo naira 600
Hukumar ta gode wa ’yan fanshon bisa haƙuri da fahimtar da suka nuna yayin kammala tsarin, tare da jaddada cewa za ta ci gaba da kokarin tabbatar da biyan fansho cikin lokaci da kuma inganta yadda ake gudanar da harkokin fansho.
Hukumar ta kuma yaba wa tsoffin sojojin bisa hidimar da suka yi wa Najeriya da irin sadaukarwar da suka yi wajen kare ƙasar, tare da neman ci gaba da ba ta haɗin kai wajen inganta harkokin fansho.