Gwamnan Jihar Gombe, Muhammadu Inuwa Yahaya, ya ƙaddamar da biyan Naira biliyan 10.32 na kuɗin sallamar aiki ga ’yan fansho 6,665 na gwamnatin jiha da ƙananan hukumomi.
Gwamnan ya bayyana cewa wannan sabon biyan ya kai jimillar kuɗin sallamar aikin da gwamnatinsa ta biya tun bayan hawanta mulki a shekarar 2019 zuwa Naira biliyan 44.134.
A wani saƙo da ya wallafa a shafinsa na facebook, Inuwa Yahaya ya ce gwamnatinsa ta tarar da bashin kuɗin sallamar aiki da ya haura Naira biliyan 21 lokacin da ta hau mulki a shekarar 2019, amma ta fara biyan bashin domin mutunta haƙƙin waɗanda suka yi wa gwamnati hidima tare da dawo musu da mutuncinsu.
- ADC ta ce za ta tattara tare da wallafa sakamakon zaɓe a 2027
- ’Yan sanda sun kama mutane kan jabun lambobin babura da kisan gilla a Neja
Ya ce a halin yanzu, an kammala biyan dukkan bashin kuɗin sallamar aikin ma’aikatan gwamnatin jiha da ya taso har zuwa Disamban 2025, yayin da za a biya waɗanda bashinsu ya taso a shekarar 2026 a farkon shekarar 2027.
Gwamnan ya kuma bayyana fatansa na barin mulki ba tare da wani bashin kuɗin sallamar aiki da bai biya ba, da yardar Allah.
Ya gode wa ’yan fansho, Ƙungiyar Kwadago ta Najeriya (NLC) da Ƙungiyar ’Yan Fansho ta Najeriya bisa haƙuri da haɗin gwiwar da suka nuna.
Ya ƙara da cewa jin daɗin ’yan fansho na cikin abubuwan da gwamnatinsa ke ba muhimmanci.