Hukumar Kula da Daidaito a Wakilcin Tarayya ta Najeriya (FCC) ta jaddada muhimmancin ingantattun bayanan ƙididdiga wajen gano gibi a wakilcin al’umma da tabbatar da adalci wajen raba damammaki a hukumomin tarayya.
Hukumar ta bayyana hakan ne lokacin da ta karɓi bakuncin Prince Adeyemi Adeniran, Babban Masanin Ƙididdiga na Najeriya kuma Babban Jami’in Hukumar Ƙididdiga ta Ƙasa (NBS), wanda ya kai mata ziyarar girmamawa.
- ’Yan sanda sun kama mutane kan jabun lambobin babura da kisan gilla a Neja
- Rundunar ’yan sandan Kano ta kama mutane 47 kan daba da safarar miyagun ƙwayoyi
FCC ta ce sahihan bayanan ƙididdiga na taimaka wa wajen tantance yadda ake raba damammaki a faɗin ƙasar, da gano wuraren da ake samun ƙarancin wakilci da kuma ƙarfafa sa ido kan hukumomin gwamnatin tarayya bisa hujjoji.
Ta bayyana cewa haɗin gwiwar da ke tsakanin FCC da NBS na da muhimmanci wajen tabbatar da cewa ana auna yadda ake aiwatar da manufofin daidaito, da maimakon dogaro da zato kawai.
Hukumar ta ƙara da cewa manufarta ita ce tabbatar da cewa adalci wajen wakilcin jihohi da al’ummomi a naɗe-naɗen tarayya da rabon damammaki ya zama abin da za a iya aunawa, sa ido a kai da kuma tabbatarwa ta hanyar sahihan bayanai.