Hukumar Kwastam ta Najeriya (NCS), reshen Enugu, Anambra da Ebonyi, ta tabbatar da cewa tara kuɗaɗen shiga da sauƙaƙa harkokin cinikayya ne manyan abubuwan da ta sa a gaba, tare da alƙawarin magance matsalolin da ke kawo cikas ga kasuwanci da jigilar kaya.
Mukaddashin Kwanturolan hukumar na yankin, Mark Behora, ya bayyana hakan a ranar Talata, 13 ga Oktoba, 2026, yayin ganawa da masu gudanar da tashoshin kwastam masu zaman kansu, ’yan kasuwar kayayyakin da ake biyan harajin fitarwa daga masana’antu da sauran masu ruwa da tsaki.
Behora ya ce tara kuɗaɗen shiga dole ne ya tafi tare da sauƙaƙa cinikayya, bin ƙa’idoji da inganta ayyuka.
- Kamfanin Dangote ya ware miliyoyin nairori don tallafawa karatun ɗalibai a Benue
- An yanke wa jami’in Ma’aikatar Lafiya hukuncin ɗaurin shekara 7 kan takardar bogi
Ya tabbatar wa masu ruwa da tsakin cewa hukumar za ta tabbatar da gaskiya da bin doka a harkokin cinikayya, ba tare da jinkirta ayyukan ’yan kasuwa masu bin ƙa’ida ba.
Ya amince da korafe-korafen masu tashoshin kaya kan jinkirin sarrafa takardun transire a wasu manyan tashoshin jiragen ruwa, lamarin da ke kawo cikas ga jigilar kaya zuwa yankin.
Ya ce hukumar za ta duba hanyoyin magance matsalar bisa ƙa’idojin aikinta.
Mukaddashin kwanturolan ya kuma buƙaci masu tashoshin da abin ya shafa su warware matsalolin da suka taso da rundunar musamman mai kula da takardun transire (STFT), domin a dawo da ayyuka yadda ya kamata cikin gaggawa.
A nasu ɓangaren, masu tashoshin kaya sun roƙi Behora ya yi amfani da matsayinsa wajen magance jinkirin sarrafa takardun, yayin da ’yan kasuwar kayayyakin da ake biyan harajin fitarwa daga masana’antu suka yaba da yadda hukumar ke gudanar da ayyukanta tare da alƙawarin ci gaba da ba ta goyon baya domin cimma tare da zarce burin tara kuɗaɗen shiga.