Najeriya da Rwanda sun amince da ƙarfafa haɗin gwiwar sojojinsu, inganta ƙwarewar gudanar da ayyukan tsaro da kuma samar da hanyoyin magance matsalolin tsaron Afirka ƙarƙashin jagorancin ƙasashen nahiyar.
Hafsan Sojin Ƙasa na Najeriya, Laftanar Janar Waidi Shaibu, da Hafsan Sojin Rwanda, Manjo Janar Vincent Nyakarundi, ne suka bayyana hakan yayin wani liyafar cin abinci da rundunar tsaron Rwanda ta shirya domin girmama tawagar Najeriya, a ƙarshen ziyarar aiki ta kwanaki biyar da Shaibu ya kai ƙasar.
Shaibu ya ce ta’addanci, tsattsauran ra’ayi mai nasaba da tashin hankali, aikata manyan laifuffuka a ƙasashe daban-daban da kuma yaɗuwar makamai ba bisa ƙa’ida ba na buƙatar ƙarfafa haɗin gwiwar sojoji, musayar bayanan sirri da kuma haɗin gwiwar ƙasashen Afirka wajen magance matsalolin.
- An yanke wa jami’in Ma’aikatar Lafiya hukuncin ɗaurin shekara 7 kan takardar bogi
- Kamfanin Dangote ya ware miliyoyin nairori don tallafawa karatun ɗalibai a Benue
Ya bayyana cewa ƙwarewar Najeriya wajen yaƙi da ta’addanci da tawaye, tare da ƙwarewar Rwanda a ayyukan wanzar da zaman lafiya da sake gina yankunan da rikici ya shafa, za su samar da ingantaccen tushe na haɗin gwiwa.
Ya lissafa horar da sojoji, musayar ƙwarewa, atisayen haɗin gwiwa, musayar bayanan sirri, tsaron intanet, jiragen saman soji da bunƙasa fasahar ƙera kayan aikin tsaro a matsayin muhimman fannoni.
Shaibu ya kuma jaddada muhimmancin amfani da sabbin fasahohi, musamman jiragen sama marasa matuƙa, ingantattun na’urorin sa ido da basirar AI, domin ƙara ingancin ayyukan soji da rage dogaro da ƙasashen waje.
A nasa ɓangaren, Nyakarundi ya yaba da ziyarar, yana mai cewa za ta ƙarfafa dangantakar soji tsakanin ƙasashen biyu tare da samar da haɗin gwiwa mai amfani.
Shugabannin sojojin biyu sun sake tabbatar da aniyarsu ta mayar da sakamakon ziyarar zuwa ayyukan zahiri da za su ƙara shirin ko-ta-kwana da ƙwarewar rundunoninsu, tare da inganta tsaron Afirka baki ɗaya.