Gwamnan Jihar Gombe, Muhammadu Inuwa Yahaya, ya gana da Shugaba Bola Ahmed Tinubu a fadar shugaban ƙasa da ke Abuja, inda suka tattauna batutuwan ƙasa da hanyoyin bunƙasa Jihar Gombe da Arewacin Najeriya.
Gwamnan ya bayyana cewa tattaunawar ta mayar da hankali kan fannoni da ke buƙatar tallafin gwamnatin tarayya da ƙarfafa haɗin gwiwa domin hanzarta ci gaba da inganta rayuwar al’umma.
- Najeriya da Rwanda sun ƙarfafa haɗin gwiwar soji don magance matsalolin tsaro a Afirka
- Sheikh Musa Ayuba Lukuwa ya zargi gwamnatin Sakkwato da sakin wanda ya yi barazanar kashe shi
Inuwa Yahaya, wanda kuma shi ne shugaban Ƙungiyar Gwamnonin Arewacin Najeriya, ya ce ya gabatar da batutuwan da suka shafi yankin Arewa baki ɗaya, tare da jaddada buƙatar ci gaba da tattaunawa da haɗa kai wajen magance ƙalubalen yankin.
Gwamnan ya gode wa Tinubu bisa karɓar sa da kuma sauraron batutuwan da ya gabatar yayin ganawar.
Ya kuma jaddada aniyarsa ta ƙarfafa hulɗa da gwamnatin tarayya da neman ayyukan tallafi da za su kawo ci gaba mai ma’ana ga Jihar Gombe, yankin Arewa maso Gabas da Arewacin Najeriya baki ɗaya.