Akpabio ya bayyana hakan ne lokacin da ya karɓi tawagar Kwamitin Haɗin Gwiwar Tattalin Arziki da Ci Gaba na Majalisar Dokokin Jamus, ƙarƙashin jagorancin shugabanta, Farfesa Wolfgang Stefinger, a ofishinsa da ke Majalisar Ƙasa a Abuja.
Ya ce Najeriya da Jamus sun shafe sama da shekaru 60 suna hulɗa, amma ya kamata a mayar da wannan dangantaka zuwa ayyukan da za su samar da masana’antu, jawo jarin ƙasashen waje, samar da ayyukan yi da inganta rayuwar jama’a.
- IMF ya naɗa ɗan China Min Liao a matsayin mataimakin manajan daraktansa
- Sojojin Nigeria sun dakile harin kwanton ɓauna a Zamfara, sun kwato dabbobi 520 a Sokoto
Shugaban majalisar ya kuma jaddada muhimmancin samar da ingantacciyar wutar lantarki ga masana’antu, yana mai buƙatar a gaggauta aiwatar da shirin samar da lantarki na shugaban ƙasa tare da kamfanin Siemens.
Ya kuma nemi a ƙarfafa haɗin gwiwa a fannonin makamashi, iskar gas, koyon sana’o’i, fasahar zamani da basirar wucin gadi.
Akpabio ya buƙaci a faɗaɗa haɗin gwiwar tsaro, musayar bayanan sirri da yaƙi da fataucin mutane, tare da samar da hanyoyin ƙaura na halal.
Ya kuma gabatar da shawarar kafa tattaunawar majalisun Najeriya da Jamus akai-akai domin tabbatar da cewa yarjejeniyoyin ƙasashen biyu sun haifar da ayyukan ci gaba da za a iya gani.