Ƙasar Birtaniya ta sake jaddada aniyarta ta ƙarfafa haɗin gwiwar tsaro da Najeriya, musamman a fannonin haɗin gwiwar soja, horas da jami’an soja, inganta cibiyoyin tsaro da ƙara ƙwarewar gudanar da ayyukan soji.
An bayyana hakan ne yayin ziyarar ban-girma da sabon babban jami’in diflomasiyyar Birtaniya a Najeriya, Pete Vowles, ya kai wa Babban Hafsan Tsaron Najeriya, Janar OO Oluyede, a hedikwatar tsaro da ke Abuja.
Vowles ya yaba da kyakkyawar alaƙar siyasa, diflomasiyya da soja da ke tsakanin ƙasashen biyu, yana mai cewa haɗin gwiwar tsaro na daga cikin muhimman ginshiƙan dangantakarsu.
- ADC ta ce kalaman Yari sun nuna gazawar APC wajen magance matsalar tsaro
- Gwamnatin Najeriya ta tabbatar da bullar cutar Ebola a Abuja
Ya kuma bayyana aniyarsa ta ci gaba da shirye-shiryen tsaro da ake gudanarwa tare da nemo sabbin hanyoyin faɗaɗa haɗin gwiwar domin tunkarar barazanar tsaro da ke sauyawa a yankin da duniya.
A nasa jawabin, Janar Oluyede ya ce Najeriya da Birtaniya sun daɗe suna da alaƙa ta tarihi, tare da ci gaba da haɗin gwiwar tsaro tsawon shekaru da dama domin magance matsalolin tsaro da suka shafe su.
Ya jaddada muhimmancin faɗaɗa haɗin gwiwar da ake da shi, musamman wajen horas da jami’an soja, musayar fasaha da inganta ƙwarewar cibiyoyin tsaro.
Ya ce yarjejeniyoyin tsaro da shirye-shiryen horaswa da ake gudanarwa sun taimaka wajen ƙara ƙwarewa da ƙarfin aiki na Rundunar Sojin Najeriya.
Sanarwar hedikwatar tsaro ta ce ƙarfafa haɗin gwiwar zai taimaka wajen inganta ƙarfin rundunonin tsaro na Najeriya da tallafa wa zaman lafiya da kwanciyar hankali a yankin, yayin da ƙasashen biyu ke ci gaba da aiki tare wajen tunkarar barazanar tsaro ta zamani.