Jami’ar Abuja ta kulla haɗin gwiwa da ƙungiyar Guardian Girls International (GGI) domin ƙarfafa wayar da kan mata, ilimin tsaro da koyar da dabarun kare kai ga ’yan mata a Najeriya.
An rattaba hannu kan yarjejeniyar ne a yayin ƙaddamar da shirin Guardian Girls Nigeria (GGN), wanda aka gudanar a ofishin jakadancin Japan da ke Abuja ranar Laraba, 14 ga Oktoba, 2026.
Mataimakin shugaban jami’ar, Farfesa Hakeem Babatunde Fawehinmi, ya sake tabbatar da goyon bayan jami’ar ga shirin, yana mai cewa manyan makarantu na da muhimmiyar rawa wajen gudanar da bincike, bunƙasa jagoranci da samar da yanayi mai aminci ga ’yan mata.
- Sojoji sun kashe ’yan Lakurawa tare da ƙwace makamai a Sokoto
- Taron AI ya jaddada buƙatar sa ido kan amfani da fasahar AI a zaɓen 2027
- Hauhawar farashi a Najeriya ya ragu zuwa kashi 14.63% a Satumba — NBS
Jakadan Japan a Najeriya, Suzuki Hideo, ya yaba da shirin, inda ya jaddada muhimmancin wasannin yaƙi wajen ƙarfafa gwiwar ’yan mata da koya musu dabarun kare kansu.
Ya ce haɗin gwiwar zai kuma ƙara ƙarfafa dangantakar Najeriya da Japan ta fuskar ci gaba, al’adu da wasanni.
Shugaban GGI, Shin Koyamada, ya bayyana cewa manufofin shirin sun haɗa da amfani da wasanni da dabarun yaƙi wajen ƙarfafa mata, tare da yaƙi da cin zarafi bisa jinsi.
Sauran mahalarta taron sun haɗa da shugabar Guardian Girls Nigeria, Ambasada Ruqayya Ahmed; wakiliyar asusun kula da yawan jama’a na Majalisar Ɗinkin Duniya (UNFPA) a Najeriya, Muriel Mafico; shugaban kwamitin wasannin Olympic na Najeriya, Injiniya Habi Gumel; da shugabar Guardian Girls Africa, Mary Obande.