Mataimakin shugaban ƙasar Najeriya, Kashim Shettima, ya soki tsohon mataimakin shugaban ƙasa Atiku Abubakar kan matsayinsa game da tallafin man fetur, yana mai cewa sauya akida ba zai magance matsalolin kasafin kuɗin ƙasa ba.
Shettima ya bayyana hakan ne ranar Laraba, yayin ƙaddamar da kwamitin yaƙin neman zaɓen shugaban ƙasa na jam’iyyar APC a zauren liyafa na fadar shugaban ƙasa da ke Abuja.
Ya ce Atiku, wanda ya daɗe yana bayyana kansa a matsayin mai goyon bayan tsarin jari-hujja, yanzu ya koma goyon bayan wani tsari da ya yi kama da akidar gurguzu, yana mai kwatanta sauyin matsayinsa da sauya tufafin akida.
- INEC ta ce fasahar AI ba ita ce za ta yanke sakamakon zaɓen 2027 ba
- Mai bincike ya zargi El-Rufai da ware dala 600,000 domin biyan jami’an EFCC
Mataimakin shugaban ƙasar ya kuma yi tambayoyi kan shirin dawo da tallafin man fetur da Atiku ya gabatar, inda ya ce ya kamata a fayyace wanda zai biya kuɗin shirin, da waɗanda za su amfana da shi da kuma sauran ayyukan gwamnati da za a rage wa kuɗaɗe domin aiwatar da shi.
Atiku, wanda shi ne ɗan takarar shugaban ƙasa na jam’iyyar ADC, ya bayyana cewa zai dawo da tallafin man fetur idan aka zaɓe shi a shekarar 2027, inda ce tallafin zai mayar da hankali kan samar da man fetur a cikin gida, ba wai tsarin tallafa wa man da ake shigowa da shi daga ƙasashen waje ba.
Tsohon mataimakin shugaban ƙasar ya ce shirin zai kasance mai iyaka, a bayyane, cikin kasafin kuɗi kuma ƙarƙashin bincike mai zaman kansa.
A ranar 9 ga Oktoba, ya kuma soki rangwamen farashin man fetur na kwanaki 30 da gwamnatin tarayya ta sanar a gidajen sayar da man NNPC, yana mai cewa bai isa ba kuma ba a bai wa kowa dama iri ɗaya ba.
Sai dai Ministan Kuɗi kuma mai kula da tattalin arzikin ƙasa, Taiwo Oyedele, ya ce rangwamen ba tallafi ba ne, sayar da man fetur ne a kan farashin da aka samar da shi, tare da ba wa masu jigilar fasinjoji fifiko.