Kwamitin yaƙin neman zaɓen shugaban ƙasa ta jam’iyyar African Democratic Congress (ADC-PCC) ta yi Allah-wadai da ƙaddamar da kwamitin yaƙin neman zaɓen shugaban ƙasa na jam’iyyar All Progressives Congress (APC) a Abuja, tana zargin hakan da yunƙurin raunana dimokuraɗiyyar jam’iyyu da dama a Najeriya.
Daraktan yaɗa labarai da hulɗa da jama’a na kwamitin ADC-PCC, Kola Ologbondiyan, ya bayyana hakan ne yayin mayar da martani kan bikin ƙaddamar da kwamitin a ranar Laraba.
Ya zargi APC da matsa wa gwamnonin jam’iyyun adawa lamba domin su shiga cikinta ko kuma a saka su cikin kwamitin yaƙin neman zaɓenta.
- An kama wani mutum bayan sare wa wani wuyan hannu a rikicin siyasa a Bauchi
- NSCIA ta taya CAN murnar cika shekara 50 da kafuwa
- ’Yan sanda sun kama wani mutum kan zargin kisan direban adaidaita da satar babur a Neja
Ologbondiyan ya kuma zargi gwamnatin APC da amfani da hukumomin gwamnati, jami’an tsaro da ɓangaren shari’a wajen raunana jam’iyyun adawa.
Ya bayyana cewa ’yan Najeriya na fuskantar matsin tattalin arziki, yunwa da rashin tsaro, yana mai zargin cewa shugabannin da ke mulki sun fi mayar da hankali kan yadda za su ci gaba da riƙe madafun iko maimakon magance matsalolin jama’a.
Kakakin kwamitin ya ce tikitin takarar shugaban ƙasa na tsohon mataimakin shugaban ƙasa, Atiku Abubakar, da tsohon gwamnan jihar Rivers, Rotimi Amaechi, na da gogewa da ƙwarewar siyasa da za su taimaka wajen dawo da amincewar jama’a ga tsarin dimokuraɗiyya.
Ya bayyana Atiku a matsayin ɗan siyasa mai gogewa da haɗin kai a faɗin ƙasa, wanda a cewarsa zai iya taimakawa wajen haɗa kan Najeriya da farfaɗo da cibiyoyin dimokuraɗiyya.
ADC-PCC ta yi kira ga ’yan Najeriya, kafafen yaɗa labarai, ƙungiyoyin fararen hula da ƙasashen duniya da su goyi bayan matakan kare tsarin dimokuraɗiyyar jam’iyyu da dama.