Rundunar ’Yan Sandan Jihar Kano ta ce ta kama mutum huɗu da ake zargi da satar motoci, tare da ƙwato motoci uku a wasu samame da ta gudanar tsakanin ranakun 8 da 9 ga Oktoba, 2026.
Sanarwar da Kakakin Rundunar, CSP Abdullahi Haruna Kiyawa, ya fitar a ranar 11 ga Oktoba, ta ce an samu nasarorin ne sakamakon ayyukan bincike da tattara bayanan sirri, tare da haɗin gwiwar al’umma.
A samamen farko, rundunar ta ƙwato wata motar Toyota Corolla kirar 2010, mai launin toka, bayan wani mutum daga unguwar Darmanawa ya kai ƙara cewa ya bai wa mutun, wanda aka fi sani da Dambu, motar domin ya sayar masa da ita, amma ya karkatar da ita zuwa wani wuri ba tare da izininsa ba.
- INEC ta musanta sanarwar bogi kan ’yan takarar gwamna a jihohi shida
- Sojoji sun hallaka ’yan ta’addar ISWAP sama da 40 a Borno
- ADC-PCC ta zargi ’yan sanda da dakile gangamin ‘Tinubu Must Go’ a Kano
Rundunar ta ce jami’an sashen yaƙi da garkuwa da mutane sun gano motar a hannun wani, wanda ya ce ya saye ta kan naira miliyan 7.5. Ana ci gaba da bincike kan lamarin.
A wani samame kuma, ’yan sanda sun kama wasu masu shekaru 23 da shekaru 25, bisa zargin satar wata ƙaramar motar haya ta Toyota Hiace, mai lambar rajista NSR 261 XB, daga kasuwar Singer a Kano.
Haka kuma, jami’an rundunar sun kama wani mai shekaru 40 daga Potiskum ta Jihar Yobe, tare da ƙwato wata motar ɗaukar kaya kirar Mitsubishi Canter, mai lambar rajista BLF 365 XA. An kama shi ne a unguwar Kadawa, inda aka kai motar garejin wani mutum domin a sauya mata launi.
A cewar rundunar, wanda ake zargin ya amsa cewa ya sace motar ne daga wani gareji a Potiskum. Rundunar ’yan sandan Kano ta tuntubi takwararta ta Jihar Yobe domin ɗaukar matakan da suka dace da kuma gano mai motar na gaskiya.
Rundunar ta ce za a gurfanar da waɗanda ake zargin a gaban kotu bayan kammala bincike, yayin da ake ƙoƙarin cafke sauran waɗanda ake zargin suna da hannu a laifukan.
Kwamishinan ’Yan Sandan Kano, Ibrahim Adamu Bakori, ya yaba wa jami’an da suka gudanar da samamen, tare da kira ga masu motoci da su ƙara kula da tsaron dukiyoyinsu, su miƙa su ga amintattun mutane kawai, sannan su sanya na’urorin kariya domin rage haɗarin sata.
Ya kuma buƙaci jama’a su riƙa kai rahoton motsin da ake zargi ko yunƙurin sayar da motoci a farashi mai rahusa fiye da yadda aka saba.