Majalisar Dattawan Najeriya ta bukaci Gwamnatin Tarayya da hukumomin da abin ya shafa da su gaggauta kai agaji ga iyalan da ambaliyar ruwa da zaizayar ƙasa suka shafa a sassan ƙasar.
Majalisar ta kuma bukaci a gyara hanyoyin da suka lalace, dawo da hanyoyin shiga al’ummomin da ambaliyar ta ware, tare da tallafa wa manoman da suka rasa hanyoyin samun abin rayuwarsu.
Wannan mataki ya biyo bayan ƙudurin da majalisar ta amince da shi, sakamakon ƙudurorin gaggawa da suka yi nuni da irin barnar da ambaliyar ruwa da zaizayar ƙasa suka haddasa, musamman a jihohin Anambra, Ebonyi da Imo.
- Nwabufo ya bayyana darussa biyar daga ƙaddamar da kwamitin yaƙin neman zaɓen APC
- Atiku ya ƙaddamar da shafin tambayoyi kai tsaye daga ’yan Najeriya
Haka kuma, majalisar ta umarci kwamitocin da abin ya shafa da su tantance al’ummomin da bala’in ya shafa, sannan su gabatar da rahotonsu da shawarwarin matakan da ya kamata a ɗauka cikin wata guda.
Majalisar ta bayyana alhini ga iyalan da suka rasa ’yan uwansu, gidajensu da hanyoyin samun abin rayuwa sakamakon waɗannan bala’o’i.
Ta kuma jaddada cewa za ta ci gaba da matsa lamba domin ganin an kula da halin da waɗanda abin ya shafa suke ciki, tare da samar musu da tallafin da ya dace.