Rundunar ’yan sandan Jihar Bauchi ta ce ta samu nasarori uku a cikin sa’o’i 24, ciki har da dakile fashi da makami, kama wanda ake zargi da kisan kai da kuma kama wata mata da ake zargi da safarar miyagun ƙwayoyi.
A samamen farko, jami’an ’yan sanda sun kama wani matashi mai shekara 22 a yankin Gidan Gona, kusa da Old Airport Road, Bauchi, bisa zargin tare ɗaliban sakandare uku da ke sanye da kayan makaranta, da yi musu barazanar soka musu wuƙa tare da kwace wayoyi biyu da darajarsu ta kai naira 50,000. \
- ADC ta ce kalaman Yari sun nuna gazawar APC wajen magance matsalar tsaro
- Sojoji sun kuɓutar da mutane 27 da aka yi garkuwa da su a Katsina
A wani lamari kuma, ’yan sanda sun kama wani matashi mai shekara 20 bisa zargin kashe wani mutum mai suna Salim Moh’d ta hanyar soka masa wuƙa bayan wani saɓani a ranar 18 ga Oktoba, 2026.
Haka kuma, jami’an ’yan sanda sun kama wata mata mai shekara 28 a yankin Bayan Gari, Bauchi, bayan samun bayanan sirri.
Rundunar ta ce sun gano ƙananan buhuna guda 10 na busassun ganyayyaki da ake zargin wiwi ne, da kuma ɗan ƙaramin adadin Methamphetamine, wanda aka fi sani da Ice.
A sanarwar da jami’in hulɗa da jama’a na rundunar, SP Nafiu Habib, ya fitar a ranar 20 ga Oktoba, 2026, rundunar ta ce za ta ci gaba da yaƙi da laifuffuka da kare rayuka da dukiyoyin jama’a.