Majalisar Wakilai ta Najeriya ta amince da bayar da tallafin Naira miliyan 100 ga tawagar ƙwallon ƙafa ta mata ’yan ƙasa da shekara 17, Flamingos, bayan lashe gasar cin kofin duniya ta FIFA ta shekarar 2026 a birnin Rabat na ƙasar Morocco.
Majalisar ta kuma buƙaci Gwamnatin Tarayya ta bai wa ’yan wasan cikakken tallafin karatu a makarantun gaba da sakandare da suka zaɓa, tare da gayyatar ’yan wasan, kocinsu da sauran ma’aikatan fasaha domin karrama su a zaman majalisa.
A zaman majalisar na ranar Alhamis, 12 ga Nuwamba, 2026, ƙarƙashin jagorancin Kakakin Majalisar, Tajudeen Abbas, an kuma kafa kwamitin musamman domin binciken hare-hare da barazanar da ake fuskanta a tarukan siyasa a jihohin Enugu, Katsina, Nasarawa, Delta da Cross River.
- Shugaban Iran ya kammala ziyarar aiki a Turkiyya bayan halartar taron COP31
- ECOWAS ta nemi ƙarfafa haɗin gwiwar soji da Najeriya don magance matsalolin tsaro a yammacin Afirka
Kwamitin, ƙarƙashin jagorancin Shugaban Masu Rinjaye, zai gabatar da rahotonsa cikin makonni uku.
Haka kuma, majalisar ta buƙaci Ma’aikatar Ayyuka da hukumomin da abin ya shafa su ɗauki matakan rage cunkoson ababen hawa a babbar hanyar Abuja zuwa Kaduna, tare da ƙara yawan zirga-zirgar jiragen ƙasa da ƙarin motocin ɗaukar fasinjoji a wannan hanya.
A wani ɓangare na zaman, majalisar ta nemi ƙarfafa kariyar da ake bai wa alkalai daga barazana da tsangwama, da kuma inganta dakunan gwaje-gwaje da wuraren horas da ƙwararru a manyan makarantu.

Ta kuma buƙaci a gudanar da cikakken bincike kan hatsarin jirgin ƙasa da ya faru a hanyar Itakpe-Warri a watan Yunin 2026, kafin dawo da zirga-zirgar cikin aminci.
Bugu da ƙari, majalisar ta karanta ƙudirin dokoki 13 a karatu na farko, yayin da wasu shida suka samu matakai daban-daban a karatu na biyu.

Ta kuma amince da dokoki uku a karatu na uku da suka shafi ƙarfafa ikon hukumar kula da malalar mai, kafa cibiyar yaƙi da cututtuka masu yaɗuwa da kare masu fama da tarin fuka daga nuna musu wariya.