Mataimakin Shugaban Hukumar Ƙungiyar Raya Tattalin Arzikin Ƙasashen Yammacin Afirka (ECOWAS), Anthony Oluwatosin Ogunjimi, ya nemi ƙarfafa haɗin gwiwar tsaro tsakanin hukumar da Hedikwatar Tsaron Najeriya domin tunkarar matsalolin tsaro da ke addabar yankin Afirka ta Yamma.

Ogunjimi ya bayyana hakan ne ranar Alhamis, 12 ga Nuwamba, 2026, yayin wata ziyarar sanayya da ya kai Hedikwatar Tsaron Najeriya da ke Abuja, inda Babban Hafsan Tsaron Ƙasa, Janar Olufemi Oluyede, ya tarbe shi.

Mataimakin shugaban hukumar ya yaba wa Najeriya kan gudunmawar da take bayarwa wajen tabbatar da zaman lafiya da tsaro a yankin, musamman rawar da dakarun sojin ƙasar suka taka a ayyukan wanzar da zaman lafiya a Laberiya, Saliyo, Gambiya da Guinea-Bissau.

Ya bayyana cewa jajircewar Najeriya wajen haɗin gwiwar tsaro na daga cikin muhimman ginshiƙan ƙoƙarin ECOWAS na haɗa kan ƙasashen yankin da tabbatar da zaman lafiya.

Ogunjimi ya kuma yaba wa shugabancin Hedikwatar Tsaron Najeriya kan ƙoƙarin kare iyakokin ƙasar, tare da bayyana muradin ECOWAS na faɗaɗa dangantakarsu ta fuskar haɗin gwiwar tsaro, tattaunawar dabarun aiki da sauran shirye-shiryen tunkarar sabbin barazanar tsaro a yankin.

A nasa jawabin, Janar Oluyede ya jaddada muhimmancin haɗin gwiwa, amincewa da juna da ɗaukar alhakin tsaro tare tsakanin ƙasashen ECOWAS.

Ya kuma buƙaci ƙasashen yankin su ƙarfafa alaƙar sojojinsu da yin aiki tare domin cimma manufofin ƙungiyar.

By Bashar Muhammad Dange

Bashar Muhammad is a Nigerian multimedia journalist, broadcaster, producer, and Digital Manager at Blueprint Radio Hausa. He holds a B.Sc. and a Diploma in Mass Communication. He has experience in news reporting, radio production, digital media management, and content creation.

Leave a Reply

Your email address will not be published. Required fields are marked *