Ana ci gaba da samun tashin hankali game da makomar Mashigar Hormuz, yayin da Amurka da Iran dukansu ke ikirarin cewa su ne ke da iko da wannan muhimmiyar hanyar ruwa ta kasuwanci.
An ga jiragen ruwa suna zirga-zirga a mashigar a ranar Asabar, yayin da gwamnatin Trump ke ci gaba da jaddada cewa Rundunar Sojin Ruwa ta Amurka ce ke kula da hanyar. Kafin fara yaƙin, kusan kashi 20 cikin 100 na man da ake safarar sa a duniya yana ratsa wannan mashiga.
Shugaban Amurka, Donald Trump, da wasu daga cikin mataimakansa sun dage cewa adadin man da ake fitarwa daga yankin Gulf ta mashigar ya koma kusa da matakin da yake kafin fara yaƙin.
- Jami’an kula da namun daji na Kenya sun fara kama kadoji a gabar tafkin Baringo
- Kenya: Ma’aikatan jinya sun gudanar da zanga-zanga a Nairobi kan yanayin aiki
- Shugaban Green Party a Ingila na neman kujerar Majalisa
Mataimakin Shugaban Amurka, JD Vance, ya bayyana a wani taron manema labarai ranar Alhamis cewa jiragen ruwan Amurka sun yi wa jigilar kusan ganga miliyan 15 na man fetur rakiya a ranar Laraba.
Hakan na zuwa ne bayan Sakataren Makamashi na Amurka, Chris Wright, ya shaida wa CNBC ranar Laraba cewa ganga miliyan 17 na man fetur sun ratsa mashigar ranar Litinin, tare da taimakon Rundunar Sojin Ruwa ta Amurka.
Sai dai wasu kamfanoni masu zaman kansu da ke bibiyar zirga-zirgar jiragen ruwa sun bayyana cewa yawan zirga-zirgar jiragen ruwa a mashigar har yanzu yana ƙasa matuka da matakin da yake kafin yaƙin.
Sabbin hare-haren da Amurka ta kai kan wasu wurare a Iran da kuma hare-haren ramuwar gayya da Tehran ta kai a yankin a wannan makon sun kuma kawo cikas ga ƙoƙarin dawo da zirga-zirgar jiragen ruwa zuwa yadda take a baya.
A halin da ake ciki, farashin man fetur a ƙasashe daban-daban na ci gaba da tashi zuwa matakan da ba a taɓa gani ba, yayin da sabon ƙara dagulewar rikicin ya haifar da ƙarin tashin farashin.