Aƙalla mutane biyu ne suka mutu, yayin da aka lalata wata babbar matatar man fetur a wani hari ta sama da Ukraine ta kai birnin Moscow na Rasha, a daidai lokacin da zaɓen majalisar dokokin Rasha ke shiga ranar ƙarshe.
Magajin birnin Moscow, Sergei Sobyanin, ya ce a ranar Lahadi an yi nasarar kakkabo makamai masu linzami sama da 1,600, ciki har da 450 da ake zargin suna kan hanyarsu zuwa babban birnin ƙasar.
A gefe guda kuma, hukumomin Ukraine sun ce aƙalla mutane huɗu ne suka mutu a hare-haren da Rasha ta kai yankin Kyiv cikin dare, ciki har da yara uku.
- Babu yiwuwar AI ta jawo ƙarshen duniya a 2030-Jensen Huang
- Ɗalibin tukin jirgi da mai koyar da shi sun mutu a hadarin jirgi a Kenya
- MDD tace Sudan ta Kudu ba ta yi nasara a yaki da cin hanci ba
Hare-haren na zuwa ne yayin da rikici tsakanin Rasha da Ukraine ke ƙara tsananta.
A wani labarin kuma, shugaban Hukumar Zaɓe ta Tsakiyar Rasha ya ce harin jirgi mara matuki kan wata motar bas mai ɗauke da fararen hula ya kashe mutane biyu, ciki har da wani jami’in zaɓe, a wani yanki na Kherson da ke ƙarƙashin ikon Rasha a Ukraine, kamar yadda kamfanin dillancin labarai na RIA Novosti ya ruwaito.
Hare-haren sun zo ne yayin da Kyiv ke ƙara tsananta amfani da jiragen ƙunar-ɓauna masu cin dogon zango wajen kai hare-hare cikin ƙasar Rasha, musamman kan kayayyakin more rayuwa na makamashi, da nufin rage wata muhimmiyar hanyar samun kuɗaɗen da gwamnatin Kremlin ke amfani da su wajen gudanar da yaƙin.