An kama wani matashi mai shekaru 33, bisa zargin rubuta jarabawar ƙarin matsayin ma’aikatan Hukumar Kula da Ma’aikatan Babban Birnin Tarayya (FCT Civil Service Commission) a madadin mahaifinsa.
An kama matashin ne a rana ta uku ta jarabawar da ake gudanarwa a harabar Jami’ar National Open University of Nigeria (NOUN) da ke Abuja.
Rahotanni sun ce jami’an tsaro da aka tura wajen tabbatar da tsaron jarabawar ne suka gano shi.
- Shettima ya ce za a gaggauta samar da dokar abinci da gina jiki
- Dalilan da ke hana ‘yan arewa cin nasara a ƙwallon ƙafa a ƙasashen waje – Babawo
A lokacin da ake yi masa tambayoyi, Matashin ya ce mahaifinsa,, wanda ma’aikaci ne a Hukumar Kashe Gobara ta FCT, ba shi da lafiya, kuma shi ne ya umarce shi da ya zauna ya rubuta jarabawar a madadinsa.
Sai dai an samu saɓani kan shekarun mahaifin, inda Matashin ya ce mahaifinsa yana da tsakanin shekaru 67 zuwa 68, yayin da Mahaifinsa ya bayyana cewa zai cika shekaru 60 a watan Fabrairun 2027.
Ya kuma ce ya kammala makarantar firamare a 1977 da sakandare a 1982.
Bayan yi musu tambayoyi da jami’an DSS, an mika mahaifin da ɗan nasa ga ’yan sanda domin gudanar da ƙarin bincike kan lamarin da kuma matakin da ya dace a ɗauka.
Lamarin ya jawo hankali kan matakan tsaro da tantancewar da ake yi yayin jarabawar ƙarin matsayin ma’aikatan FCT, musamman yadda hukumomi ke ƙoƙarin tabbatar da sahihancin tsarin da kuma hana magudi ko wakilcin wani yayin jarabawa.