Ɗan takarar shugaban ƙasa na jam’iyyar ADC, Atiku Abubakar, ya yi alƙawarin samar haraji mai sauƙin ga sabbin kamfanoni a shekarunsu na farko, tare da buɗe musu damar samun kwangilolin gwamnati idan ya zama shugaban ƙasa.
Atiku ya bayyana hakan ne yayin wani taro na Moonshot by TechCabal da aka gudanar a gidan wasan kwaikwayo na ƙasa da ke Legas, inda ya gana da masu kafa kamfanoni, injiniyoyi da masu ƙirƙire-ƙirƙire a fannin fasaha.
- ’Yan sanda sun miƙa buhunan ganyen da ake zargin tabar wiwi ne 69 ga NDLEA
- “Lokaci kan sauya abubuwa, amma abota da mutunta juna suna nan daram.” — Abdul Samad Rabiu
Ya ce yana son samar da manufofin gwamnati da za su taimaka wa kamfanonin fasaha su bunƙasa, yana mai cewa kamfanonin Najeriya sun samu nasarori duk da ƙalubalen manufofin gwamnati da suka fuskanta.
Ɗan takarar ya kuma yi alƙawarin mayar da gwamnati abokiyar cinikin kamfanonin ta hanyar mayar da ayyukan gwamnati, tsarin kasafin kuɗi da sayen kayayyaki da kwangiloli zuwa tsarin dijital.
Atiku ya ce ƙwarewar matasan Najeriya ta nuna irin abin da za su iya cimmawa da kansu, yana mai cewa haɗin kai tsakanin gwamnati da kamfanonin fasaha zai iya ƙara bunƙasa wannan fanni.