Hukumar Shige da Fice ta Gambiya ta tare mutane 46 da ake zargin na shirin yin hijira ba bisa ƙa’ida ba, a yankunan Brufut da Batokunku da ke yankin West Coast na ƙasar.
Sanarwar hukumar ta ce an gudanar da samamen ne a daren Litinin, 19 ga Oktoba, 2026, ta hannun jami’an sintiri na kan iyaka tare da haɗin gwiwar sashen kula da ƙaura da ke Tanji da taimakon abokan hulɗar shirin COP II.
Daga cikin mutanen da aka tare, 22 an same su a Batokunku, yayin da aka tare wasu 24 a Brufut.
- Obi ya musanta adawa da tallafin ’yan Najeriya mazauna ƙasashen waje ga iyalansu
- Amnesty International ta bukaci a dauki mataki kan zargin kashe fararen hula da ’yan sanda ke yi
Haka kuma, an kama wani da ake zargin mai safarar bakin haure ne, wanda ke taimaka wa jami’ai wajen gudanar da bincike.
Hukumar ta ce mutanen sun haɗa da ’yan Gambiya 23, ’yan Senegal 22 da ɗan ƙasar Guinea guda ɗaya. A cikinsu akwai maza 40, mata huɗu da ƙananan yara biyu.
Hukumar Shige da Fice ta Gambiya ta ce aikin na daga cikin ƙoƙarinta na kare rayuka da hana matasa shiga hijira ba bisa ƙa’ida ba, tare da ƙarfafa hanyoyin ƙaura masu aminci da bin doka.