Ministan Tsaro, Janar Christopher Gwabin Musa mai ritaya, ya yi kira ga ’yan Najeriya da su ƙara ƙarfafa imani, haɗin kai da goyon bayan jami’an tsaro domin tabbatar da zaman lafiya da tsaro a ƙasar.
Janar Musa ya yi wannan kiran ne a yayin ibadar coci ta ƙasa da ƙasa da aka gudanar a National Christian Centre da ke Abuja domin bikin cika shekaru 66 da samun ’yancin kan Najeriya.
Ministan, wanda ya gabatar da karatun farko na Littafi Mai Tsarki a wajen ibadar, ya ce fatan samun Najeriya mai zaman lafiya, da tsaro da wadata ya kasance mai ƙarfi, yana mai jaddada cewa tsaro ba aikin sojoji da jami’an tsaro kaɗai ba ne.
- Peter Obi ya soki Tinubu kan rashin halartar taron UNGA
- Shettima ya dawo Najeriya bayan taron Majalisar Ɗinkin Duniya
Ya ce tsaro shi ne ginshiƙin da ake gina haɗin kan ƙasa da ci gaban tattalin arziki a kai, tare da tabbatar da cewa Rundunar Sojin Najeriya na ci gaba da kare ikon ƙasar da kuma ƙoƙarin dawo da zaman lafiya mai ɗorewa a sassan Najeriya.
A nasa ɓangaren, Shugaban Majalisar Dattawa, Godswill Akpabio, ya yi addu’ar samun zaman lafiya da haɗin kai a ƙasar, yayin da Sakataren Gwamnatin Tarayya, George Akume, ya jaddada muhimmancin zaman lafiyar dimokuraɗiyya yayin da Najeriya ke tunkarar zaɓen 2027.
Akume ya yi kira ga ’yan Najeriya da su ci gaba da goyon bayan tsarin dimokuraɗiyya, yana mai cewa zaman lafiya da haɗin kai su ne ginshiƙan dorewar tsarin.
Bikin, wanda ya samu halartar manyan jami’an gwamnati, da shugabannin hukumomin tsaro, da jami’an diflomasiyya da malaman addini, ya ƙare da yanke kek ɗin bikin cika shekaru 66 da samun ’yancin kan Najeriya.