Hukumar Kula da Yanayi ta Najeriya (NiMet) da Ƙungiyar Kula da Yanayi ta Duniya (WMO) sun yi kira ga ƙasashen Afirka da su ƙara zuba jari a ayyukan hasashen yanayi domin inganta gargaɗin farko, kare rayuka da tallafa wa ci gaban tattalin arziki.
Babban daraktan NiMet, Farfesa Charles Anosike, ya yi kiran ne yayin buɗe taron shekara-shekara na Ƙungiyar Haɗin Gwiwar Bunƙasa Ayyukan Yanayi da Ruwa a Legas, wanda aka gudanar daga 13 zuwa 15 ga Oktoba, 2026.
Anosike ya ce Afirka na da kusan kashi 30 cikin 100 na gibin bayanan lura da yanayi na duniya, yayin da yawan tashoshin lura da yanayi a nahiyar ya kai kashi 12.5 cikin 100 ne kawai na mafi ƙarancin adadin da WMO ta ba da shawarar samu.
- Shettima ya buƙaci gyara tsarin shari’a domin hana masu hannu da shuni kauce wa hukunci
- INEC da ECONEC sun amince da ƙa’idojin amfani da AI a zaɓe
Ya buƙaci ƙarin zuba jari a kayayyakin lura da yanayi da fasahar tattara bayanai, tare da ƙarfafa haɗin gwiwa tsakanin gwamnati da kamfanoni masu zaman kansu.
Ya ce bayanan yanayi na da muhimmanci ga noma, sufurin jiragen sama, zirga-zirgar ruwa da kuma shirin tunkarar bala’o’i.
Shugaban WMO, Dakta Abdulla Ahmed Al Mandous, ya ce lokacin da ya rage zuwa shekarar 2030 na da muhimmanci wajen cike gibin kayan aiki da ƙwarewa a fannin yanayi da ruwa.
Ya kuma yaba wa Najeriya kan taimaka wa sauran ƙasashe, ciki har da Burkina Faso, wajen bunƙasa ayyukan lura da yanayi.
Anosike ya gode wa Gwamnatin Tarayya, musamman Shugaba Bola Ahmed Tinubu da Ministan Sufurin Jiragen Sama da Bunƙasa Sararin Samaniya, Festus Keyamo, bisa goyon bayan ƙarfafa ayyukan NiMet.
Taron ya haɗa gwamnatoci, cibiyoyin kuɗi da abokan hulɗar ci gaba domin tsara hanyoyin zuba jari da inganta ayyukan yanayi da ruwa a Afirka.