Gwamnan Jihar Legas, Babajide Sanwo-Olu, ya bukaci jam’iyyar APC da ta ƙarfafa hulɗa da jama’a tare da sauraron matsalolin da suke fuskanta gabanin babban zaɓen 2027.
Sanwo-Olu ya bayyana hakan ne a saƙon da ya wallafa bayan halartar ƙaddamar da kwamitin yaƙin neman zaɓen shugaban ƙasa na APC a Abuja, inda ya ce ya kamata jam’iyyar ta kasance cikin haɗin kai da mayar da hankali kan isar da saƙonta ga ’yan Najeriya.
- CBN ya ce burin Najeriya shi ne rage hauhawar farashi zuwa ƙasa da kashi 10
- Burkina Faso ta ƙaddamar da gasar ƙwallon ƙafa ta ‘Sovereignty League’
Gwamnan ya jaddada cewa bai kamata jam’iyyar ta tsaya kan yaɗa manufofinta kawai ba, sai dai ta saurari damuwar jama’a tare da nuna ayyukanta cewa tana da ƙudurin gina makoma mai kyau ga ƙasar.
Ya ce haɗin kai da kusanci da jama’a na da muhimmanci ga shirye-shiryen jam’iyyar na tunkarar zaɓen mai zuwa.
Sanwo-Olu bai fayyace takamaiman matsalolin da ya kamata jam’iyyar ta fara mayar da hankali a kansu ba a saƙon nasa.