Sarkin Birtaniya, Charles na Uku, zai yi magana kan illolin cinikin bayi da aka yi tsakanin Afirka da ƙasashen Amurka a lokacin jawabin da zai gabatar wa shugabannin ƙasashen Commonwealth a Antigua ranar Talata.
Fadar Buckingham ta ce sarkin zai yi magana kan wannan tarihi cikin gaskiya da kuma nuna nadama kan irin raɗaɗin da cinikin bayi ya jawo, yayin da yake kammala rangadin kwanaki tara da ya kai yankin Caribbean.
Maganar ta zo ne bayan Firaministan Birtaniya, Andy Burnham, ya bayyana cewa a shirye yake ya yi la’akari da yiwuwar ƙasar ta bayar da uzuri a hukumance kan rawar da ta taka wajen cinikin bayi, sai dai Birtaniya ba ta taɓa bayar da irin wannan uzuri a hukumance ko alƙawarin biyan diyya ba.
- AAC ta nemi a bayyana yadda aka gano wayar tawagar Sowore kusa da gidan gwamnan Ekiti
- Gwamnatin Ekiti ta ɗauki sabbin ma’aikatan lafiya 1,522 a faɗin jihar
A nata ɓangaren, shugabar jam’iyyar Conservative, Kemi Badenoch, ta soki yawan tattaunawa kan neman afuwa, tana mai cewa ya kamata ƙasashen Commonwealth su mayar da hankali kan gaba maimakon ci gaba da waiwayen abubuwan da suka faru ƙarnuka da suka gabata.
A ziyarar da ya kai Bahamas da Guyana a baya, Sarki Charles ya yi magana kan wahalhalun da aka sha a tarihi, tare da ziyartar wurin da aka yi tawayen bayi a Guyana.
Fadar Buckingham ta ce batun bayar da uzuri a hukumance da kuma biyan diyya na cikin ikon gwamnatin Birtaniya, ba na fadar sarki ba.