Rundunar ’Yan Sandan Jihar Kano ta ce ta kama wasu mutane biyu da ake zargi da aikata satar babur mai ƙafa uku, tare da kwato babur ɗin da kuma bindigogi ƙirar gida guda biyu.
A cewar rundunar, lamarin ya faru ne bayan wasu mutane sun yi hayar babur ɗin daga unguwar Hotoro da ke Kano zuwa Yar Gaya a ƙaramar hukumar Dawakin Kudu, kan kuɗin haya na N8,000.
Rundunar ta ce yayin da suke kan hanyar Kano zuwa Maiduguri, waɗanda ake zargin sun fito da bindigogi suka yi wa direban barazana tare da kwace babur ɗin.
- ’Yan sandan Abuja sun ceto wani yaro da ake zargin ya yi yunkurin sace wa ta yarinya a Kuje
- Kwamishinan ’yan sandan Ondo ya ziyarci wurin haɗarin Igbokoda
Bayan samun rahoton, rundunar ta ce ta fara gudanar da bincike da ayyukan leƙen asiri bisa umarnin Kwamishinan ’Yan Sandan Kano, CP Ibrahim Adamu Bakori.
Daga bisani, jami’an ’yan sanda na sashen Filin Hockey suka gano babur ɗin a ranar 3 ga Oktoba a Wudil, a kan hanyar Kano zuwa Maiduguri.
Rundunar ta ce an kama Abubakar Isah, mai shekaru 27, da Shehu Ibrahim, mai shekaru 25, waɗanda dukkansu mazauna ƙauyen Zogarawa ne a Dawakin Kudu.
An kuma kwato babur ɗin da ake zargin an sace da bindigogi ƙirar gida guda biyu. ’Yan sandan sun ce waɗanda ake zargin sun amsa hannu a aikata laifin yayin bincike.
Kwamishinan ’Yan Sandan Kano ya yaba wa jami’an da suka gudanar da aikin, tare da kira ga mutanen da suka taɓa fuskantar irin wannan fashi a yankin Hotoro zuwa Dawakin Kudu da Wudil da su tuntubi sashen ’yan sanda na Filin Hockey domin taimakawa wajen gano sauran waɗanda ake zargi.
Rundunar ta ce bincike na ci gaba, kuma za a gurfanar da waɗanda ake zargin a gaban kotu bayan kammala bincike.