Rundunar ’Yan Sandan Babban Birnin Tarayya, FCT, ta gargadi masu ababen hawa da su guji amfani da motoci ba tare da ingantattun lambobin rajista ba, ko kuma motocin da aka ɓoye ko goge lambobin rajistarsu.
Kwamishinan ’Yan Sandan FCT, CP Ahmed Muhammed Sanusi, ya kuma bayar da umarnin kama tare da gurfanar da duk wanda aka samu yana amfani da irin waɗannan motoci ba bisa ka’ida ba.
- Najeriya ta jagoranci tawaga zuwa taron IPU karo na 153 a Tanzania
- Najeriya ta jagoranci tawaga zuwa taron IPU karo na 153 a Tanzania
Rundunar ta ce musamman yadda ake amfani da motocin SUV da lambobin rajista da ba a iya gani na iya haifar da barazanar tsaro, saboda wasu masu aikata laifuka na amfani da irin waɗannan motoci wajen kauce wa ganowa da bin diddigi bayan aikata laifuka.
Haka kuma, rundunar ta yi gargadi kan amfani da jabun lambobin diflomasiyya ko kuma amfani da lambobin irin waɗannan motoci ba tare da izini ba.
Kwamishinan ya umurci jami’an ’yan sanda a sassan FCT da su ƙara tsaurara matakan tabbatar da bin dokokin rajistar ababen hawa, tare da yin aikin cikin ƙwarewa ba tare da amfani da shi wajen karɓar kuɗin haram ba.
Rundunar ta kuma buƙaci mazauna Abuja da su taimaka wajen tabbatar da tsaro ta hanyar kai rahoton motocin da suke zargi ko wasu abubuwan da ba su dace ba ga ofishin ’yan sanda mafi kusa.