Rundunar sojojin Operation Fansan Yamma ta ce dakarunta sun ceto wasu mutane da ’yan bindiga suka yi garkuwa da su a kan hanyar Anka zuwa Gadan Manya, a ƙaramar hukumar Anka ta Jihar Zamfara.
A cewar rundunar, lamarin ya faru ne a lokacin da dakarun Sector 2 ke gudanar da sintiri na yau da kullum, inda suka hango wasu ’yan bindiga dauke da makamai suna kai hari kan wasu mutane biyu da ke tafiya a kan babur.
- ’Yan Sandan FCT sun yi gargadi kan motocin da ba su da lambar rajista
- Najeriya ta jagoranci tawaga zuwa taron IPU karo na 153 a Tanzania
Rundunar ta ce bayan da sojojin suka samu labarin harin, sun gaggauta zuwa wurin, lamarin da ya tilasta maharan tserewa zuwa cikin daji tare da barin mutanen da suka yi garkuwa da su.
An ce bayan ceto mutanen, jami’an tsaro sun ƙara tsaurara sintiri da sauran ayyukan tabbatar da tsaro a yankin, domin hana ’yan bindiga samun damar zirga-zirga cikin sauƙi da kuma kare rayuka da dukiyoyin al’umma.
Rundunar ta kuma ce za ta ci gaba da gudanar da ayyukan tsaro a yankunan da ake fama da barazanar ’yan bindiga, domin tabbatar da zaman lafiya da tsaron mazauna yankin.