Ministan Babban Birnin Tarayya Abuja, Nyesom Wike, ya tabbatar wa gwamnatin Qatar cewa gwamnatin FCT za ta ɗauki matakan da suka dace domin warware matsalar da ta shafi filin da aka ware wa ƙasar domin gina ofishin jakadancinta a Abuja.
Wike ya bayyana hakan ne ranar Talata, lokacin da ya karɓi jakadan Qatar a Najeriya, Yousef Mohammed Ahmed Al-Hail, a Abuja. Sun tattauna kan hulɗar diflomasiyya, bunƙasa birane, zuba jari da damar haɗin gwiwa tsakanin Abuja da Doha, babban birnin Qatar.
Jakadan ya bayyana damuwarsa kan wata wasiƙar kotu da ke ƙalubalantar mallakar filin ofishin jakadancin, wanda girmansa ya kai kimanin murabba’in mita 8,000.
- Dangote Cement ta tallafa wa ɗalibai, manoma da ’yan kasuwar Jakura
- El-Rufai ya gurfana a kotu domin ci gaba da shari’ar rashawa
- APC ta ce ba za ta yi koyi da yadda Atiku ke kiran Tinubu da sunansa ba
Ya buƙaci gwamnatin FCT ta fayyace lamarin domin ƙasar ta ci gaba da shirye-shiryen gina ofishin jakadancin.
A nasa martanin, Wike ya tabbatar masa cewa gwamnati za ta ɗauki matakan da suka dace domin magance matsalar, tare da jaddada cewa tana son tabbatar da cewa halastattun muradun kasuwanci da zuba jarin Qatar a Abuja ba su fuskanci cikas ba.
Ministan ya kuma nemi ƙarfafa haɗin gwiwa tsakanin Abuja da Doha, musamman a fannin tsara birane, sufuri da samar da ababen more rayuwa na zamani.
Ya ce gwamnatin FCT na da shirin aika tawaga zuwa Qatar domin nazarin tsarin tsara birane da sauran ayyukan ci gaban ƙasar, da nufin amfani da darussan wajen bunƙasa Abuja.
Haka kuma, Wike ya gabatar da shawarar tattaunawa da ƙungiyar agaji ta Qatar Charity domin duba damar haɗin gwiwa a fannonin ilimi, kiwon lafiya, gidaje da ababen more rayuwa na al’umma.
A nasa ɓangaren, jakadan ya nemi a samar da yarjejeniyar haɗin gwiwa tsakanin Abuja da Doha domin musayar ƙwarewa da bunƙasa zuba jari, tare da bayyana damar da ke akwai ga ’yan kasuwar Najeriya a Qatar.
Jakadan ya kuma ce kamfanin jiragen sama na Qatar Airways na zirga-zirga tsakanin Doha da Abuja da Legas, tare da shirin ƙara ƙarfin zirga-zirgarsa domin biyan buƙatar fasinjoji.
Taron ya buɗe ƙofar ƙarin tattaunawa kan batun filin ofishin jakadancin da kuma faɗaɗa haɗin gwiwar ƙasashen biyu a fannonin tattalin arziki da ci gaban birane.