Ministan Abuja, Nyesom Wike, ya caccaki tsohon Gwamnan Jihar Rivers, Rotimi Amaechi, kan ikirarin da ya yi cewa tsadar magunguna sakamakon manufofin tattalin arzikin gwamnatin Shugaba Bola Tinubu ta taka rawa wajen rasuwar mahaifiyarsa.
Amaechi ya bayyana hakan ne a wata hira da gidan talabijin na Channels, inda ya ce tsadar magunguna a ƙarƙashin gwamnatin Tinubu ta sa ya fuskanci wahalar samun magungunan da mahaifiyarsa ke buƙata.
- Uzodinma ya nemi a buɗe reshen EFCC a Imo
- Majalisar Musulunci ta Ƙasa ta faɗaɗa majalisar zartarwarta
Sai dai Wike ya soki Amaechi kan shigar da batun rasuwar mahaifiyarsa cikin siyasa, yana tambayar yadda tsohon minista kuma tsohon gwamnan jihar zai ce ya kasa samun kuɗin sayen magungunan mahaifiyarsa.
Wike ya kuma yi ishara da gidajen da ya ce Amaechi yana da su a Old GRA da Abuja, yana mai tambayar dalilin da ya sa bai nemi taimakon abokansa da sauran makusantansa ba idan da gaske yana fuskantar matsalar kuɗi.
A yayin wani taro da shugabannin siyasa da masu ruwa da tsaki a Ahoada, Rivers, Wike ya ce ya yi matuƙar takaicin yadda aka kawo batun mahaifiya cikin muhawarar siyasa, inda ya furta cewa gara mutum ya zauna ba tare da ɗa ba fiye da samun ɗa mai yin irin wannan magana.