Kamfanin Dangote Cement, reshen masana’antar Obajana, zai fara gudanar da gasar ƙwallon ƙafa ta Unity Football Tournament ta 2026 ranar Juma’a, 16 ga Oktoba, domin ƙarfafa zaman lafiya, haɗin kai da kyakkyawar alaƙa tsakanin al’ummomin yankin.
Shugaban sashen hulɗa da al’umma na kamfanin, Wakeel Olayiwola, ya ce gasar za ta taimaka wajen haɗa kan al’umma, bunƙasa matasa da samar da kyakkyawar alaƙa tsakanin kamfanin da al’ummomin da ke kewaye da masana’antar.
Al’ummomin da za su fafata a gasar sun haɗa da Oyo, Iwaa, Apata, Jakura da Obajana, inda za a gudanar da wasannin a cibiyar horar da matasa ta Dangote Academy.
- Sojoji sun kashe ’yan ta’adda shida a Adamawa, sun kwato makamai
- Hukumar Shige da Fice ta Gambia ta ceto mutane 111 da ke ƙoƙarin yin ƙaura ta ruwa
Daraktan masana’antar, Injiniya Azad Nawabuddin, ya buƙaci kwamitin shirya gasar da ya tabbatar da tsaro, tantance ’yan wasa yadda ya kamata, samar da kulawar lafiya da bin dokokin gasar domin gudanar da ita cikin tsari da adalci.
Shugaban sashen hulɗa da al’umma na masana’antar, Prince Ademola Adeyemi, ya ce gasar ta wuce batun lashe kofuna, domin za ta taimaka wajen gano ƙwararrun matasa ’yan ƙwallo, tare da haɓaka ladabi, jagoranci da haɗin gwiwa.
A madadin al’ummomin yankin, shugaban matasan Apata, Comrade Ayodele Julius, ya tabbatar da goyon bayansu ga shirin.
Shugaban kwamitin shirya gasar, Idris Emmanuel, ya ce an shirya bayyana rigunan gasar a ranakun 12 da 13 ga Oktoba, yayin da mataimakinsa, Comrade Idowu Olukasam Owolabi, ya yi kira ga ƙungiyoyin da za su fafata da magoya bayansu da su kiyaye ladabi, adalci da mutunta juna a lokacin gasar.