Dakarun Sojojin Najeriya sun ce sun kashe ’yan ta’adda shida da ake zargin ’yan ƙungiyoyin Boko Haram da ISWAP ne, tare da kwato makamai da harsasai bayan dakile wani hari da aka kai sansaninsu na Garaha, a ƙaramar hukumar Hong ta Jihar Adamawa.
A cewar sanarwar rundunar Operation Hadin Kai da ta fitar ranar 13 ga Oktoba, 2026, maharan sun kai harin ne da misalin ƙarfe 9:07 na dare, inda suka yi ƙoƙarin mamaye sansanin sojojin. Sai dai rundunar ta ce dakarunta sun mayar da martani, lamarin da ya tilasta wa maharan ja da baya.
Sanarwar ta bayyana cewa bayan dakile harin, sojojin sun gudanar da bincike a yankin, inda suka gano gawarwakin ’yan ta’adda shida.
- COAS ya bukaci ƙarfafa haɗin gwiwa da musayar bayanan sirri kan tsaro
- Pantami ya ba INEC wa’adin kwanaki uku ta saka sunansa cikin jerin ’yan takarar gwamnan Gombe
- Sojoji sun kama mutum huɗu da ake zargi da safarar makamai a Filato
Haka kuma, sun kwato bindiga kirar PKT guda ɗaya da harsasai 67, da bindigogin AK-47 guda shida.
Sauran kayayyakin da aka kwato sun haɗa da harsasai 157 masu girman 7.62mm NATO, da harsasai 120 na 7.62mm Special da kuma bam ɗin turmi mai girman 60mm. Dakarun sun kuma kwato wayar Android ta Infinix, da na’urar ɗaukar bidiyo ta Canon, da jakunkunan ɗaukar ruwa guda uku da wasu kayayyakin yaƙi.
Rundunar ta tabbatar da cewa wasu sojoji sun jikkata yayin arangamar, inda ta ce ana ba su kulawar lafiya tare da shirye-shiryen kwashe su zuwa wuraren da suka dace domin samun ƙarin kulawa.
Ta ƙara da cewa dakarunta na ci gaba da sintiri da binciken yankin domin hana sake kai hare-hare da kuma gano wasu kayayyakin da za su taimaka wajen gudanar da bincike.
Rundunar Operation Hadin Kai ta ce za ta ci gaba da gudanar da ayyukan tsaro bisa sahihan bayanan sirri domin dakile ayyukan ƙungiyoyin masu tayar da ƙayar baya, da kare al’ummomin da ke fuskantar barazanar hare-hare a yankin Arewa maso Gabashin Najeriya.