Hukumar Shige da Fice ta Gambia ta ce ta ceto mutane 111 da ke ƙoƙarin yin ƙaura ta ruwa, bayan kwale-kwalensu ya makale a cikin ruwa mai laka a ƙauyen Aljamdu.
Hukumar ta ce lamarin ya faru ne ranar Lahadi, 11 ga Oktoba, 2026, inda jami’anta daga sassan kula da ƙaura da sintirin kan iyaka na Barra suka gudanar da aikin ceton tare da haɗin gwiwar Hukumar Leƙen Asiri ta Ƙasa, da Hukumar Kashe Gobara da Ceto ta Gambia, da mazauna ƙauyen.
Mutanen da aka ceto sun haɗa da ’yan ƙasar Guinea 75, Senegal 15, Ivory Coast 10, Saliyo 5, Gambia 4, Mali 1 da Ghana 1.
- Sojoji sun kama mutum huɗu da ake zargi da safarar makamai a Filato
- Wike ya ce Rainbow Coalition ba barazana ba ce ga APC
Hukumar ta bayyana cewa cikin mutanen akwai maza 58 da mata 53, ciki har da ƙananan yara 12.
A halin yanzu, an kai mutanen ofishin hukumar da ke Barra domin tantance bayanansu da gudanar da ƙarin bincike.
Hukumar ta ce aikin ya nuna muhimmancin haɗin gwiwa tsakanin hukumomin tsaro, al’ummomin yankuna da abokan hulɗa na ƙasashen duniya wajen tunkarar ƙaura ba bisa ƙa’ida ba da inganta tsarin kula da masu ƙaura.